ភ្នំពេញ៖ អ្នកនាំពាក្យកិច្ចប្រជុំកំពូលអាស៊ាន លោក គង់ ភោគ បានលើកឡើងថា អាស៊ានចង់ឃើញសន្តិភាព និងស្ថិរភាពកើតឡើងនៅអ៊ុយក្រែន ខណៈសង្គ្រាមបន្តអូសបន្លាយជិត៩ខែដែលជះឥទ្ធិពលអវិជ្ជមានជាច្រើនមកដល់ពិភពលោកទាំងមូលរាប់ចាប់ទាំងពីបញ្ហាសន្តិសុខស្បៀង និងថាមពលជាដើម។

ឆ្លើយតបនឹងសំណួរអ្នកសារព័ត៌មាននៅក្នុងសន្និសីទសារព័ត៌មាននាល្ងាចថ្ងៃទី១០ ខែវិច្ឆិកា លោក គង់ ភោគ បានលើកឡើងពីសារសំខាន់នៃវត្តមានសន្តិភាព និងស្ថិរភាព ដែលជាគ្រឹះក្នុងការកសាងតំបន់អាស៊ាន ហើយលោកថា អាស៊ានក៏ចង់ឃើញសន្តិភាព និងស្ថិរភាពកើតឡើងដូចគ្នាក្នុងតំបន់អ៊ុយក្រែន។

បន្ថែមពីលើនេះ លោក គង់ ភោគ បញ្ជាក់ទៀតថា អាស៊ានក៏ត្រៀមខ្លួនរួចជាស្រេច ក្នុងករណីដែលភាគីពាក់ព័ន្ធមើលឃើញពីតួនាទីអាស៊ាន ហើយចង់ឲ្យអាស៊ានជួយសម្របសម្រួល ជាពិសេសកម្ពុជាក្នុងនាមជាប្រធានអាស៊ានតែម្ដង។

អ្នកនាំពាក្យកិច្ចប្រជុំកំពូលអាស៊ានរូបនេះក៏បានកត់សម្គាល់ដែរថា កិច្ចប្រជុំកំពូលអាស៊ាននៅកម្ពុជា ក៏អាចជាឱកាសល្អសម្រាប់ជំនួបទ្វេភាគីរវាងរដ្ឋមន្ត្រីការបរទេសរុស្ស៉ី និងអ៊ុយក្រែនផងដែរ ហើយកម្ពុជាក៏ត្រៀមខ្លួនជាស្រេច ដើម្បីសម្របសម្រួល បើមានសំណើណាមួយ។

សូមបញ្ជាក់ថា លោក ឌីមីទ្រូ គូឡេបា (Dmytro Kuleba) រដ្ឋមន្ត្រីការបរទេសអ៊ុយក្រែនបានមកដល់កម្ពុជាកាលពីល្ងាចថ្ងៃទី០៨ ខែវិច្ឆិកា ឆ្នាំ២០២២ដោយបានចុះហត្ថលេខាលើលិខិតតុបករណ៍នៃការចូលក្នុងសមាជិកសន្ធិសញ្ញាមិត្តភាព និងកិច្ចសហប្រតិបត្តិការនៅអាស៊ីអាគ្នេយ៍ (TAC) នៅព្រឹកថ្ងៃទី១០ ខែវិច្ឆិកា។ នេះជាជំហានផ្លូវការឆ្ពោះទៅក្លាយជាដៃគូខាងក្រៅរបស់អាស៊ាន៕